ഏട്ടൻ.
ഇന്നെന്താണ് ഇവിടെ ഇത്ര ബഹളം
ഇന്ന് ആരും പുറത്ത് പോയിട്ടില്ല. എന്തൊക്കെയോ നല്ല പലഹാരങ്ങൾ ഉണ്ടാക്കുന്ന നല്ല രുചിയുള്ള, കൊതിപ്പിക്കുന്ന മണം വരുന്നുണ്ട്. എല്ലാവരും സന്തോഷത്തിലാണ്.
മുൻവശത്തെ വീട്ടിലെ അമ്മച്ചി, ചേച്ചിയോട് ചോദിക്കുന്നത് കേട്ടു..
"ഏട്ടൻ എത്ര മണിക്കാണ് എത്തുക മോളെ?"
അപ്പൊ അതാണ് കാര്യം. ഏട്ടൻ വരുന്നുണ്ട്.! ഏട്ടന് പട്ടാളത്തിൽ ആണ് ജോലി. ഞാൻ ഇത് വരെ ഏട്ടനെ കണ്ടിട്ടില്ല, ഞാൻ വരുമ്പോൾ ഏട്ടൻ പട്ടാളത്തിലാണല്ലോ. പട്ടാളക്കാരെ ഞാൻ കണ്ടിട്ടുണ്ട്.
അമ്മ കൂടെ ഉണ്ടായിരുന്നപ്പോൾ.
അന്ന്, അവിടെ എന്തൊക്കെയോ കുഴപ്പങ്ങൾ നടക്കുന്നുണ്ടായിരുന്നു.
ആളുകൾ ബഹളം വച്ച് കൊണ്ട് കൂട്ടമായി ഓടി വരികയും, മുൻപിൽ കാണുന്നതൊക്കെ തല്ലി തകർത്തു കളയുകയും, തീ വയ്ക്കുകയും ഒക്കെ ചെയ്തു കൊണ്ടിരുന്നു. വർഗീസ് മാപ്പിളയുടെ കടയും അവർ കത്തിച്ചു കളഞ്ഞു. പിന്നെ രണ്ടു മൂന്ന് ദിവസം ആരും പുറത്തിറങ്ങിയില്ല. എനിക്ക് ഭക്ഷണം പോലും കിട്ടിയില്ല. "ബന്ദ്" എന്നാണ് അമ്മ പറഞ്ഞത്. അമ്മ എന്നെ ചേർത്ത് പിടിച്ചു കൊണ്ട് ആ പഴയ കെട്ടിടത്തിന്റെ പുറകിൽ ഒളിച്ചിരുന്നു.
"ഏക്-ദോ, ഏക് -ദോ" എന്ന് ഉച്ചത്തിലുള്ള ശബ്ദം കേട്ടാണ് ഞാൻ പുറത്തേക്ക് എത്തി നോക്കിയത്. കുറെ ആളുകൾ, ഒരേ നിറത്തിലുള്ള ഉടുപ്പൊക്കെ ഉടുത്ത്, കൈയിൽ നീളത്തിൽ ഉള്ള ഒരു വടിയുമായി, ഒരേ താളത്തിൽ നടന്നു പോകുന്നു.
അത് "പട്ടാളക്കാർ" ആണെന്ന് അമ്മ പറഞ്ഞു തന്നു. കൈയിൽ തോക്ക് ആണ്. പുറത്ത് ബഹളം വയ്ക്കുന്നവരെ കണ്ടാൽ അവർ വെടി വയ്ക്കും.
ഏട്ടൻ പട്ടാളക്കാരൻ ആണ്. തോക്ക് ഉണ്ടാകുമോ? ഏട്ടന് എന്നെ മനസ്സിലാകുമോ ആവോ. ഇനി മനസിലായില്ല എങ്കിൽ വെടി വച്ചാലോ! എന്തായാലും നല്ല കുട്ടിയായി ഇരിക്കാം.
